सुवास

                     सुवास....

          ( वृत्त - अनलज्वाला )

थांबवण्याचा मीही केला प्रयास केवळ
तुझा मोगरा ठेवुन गेला सुवास केवळ

विचार आधी मीही राणी केला नाही
प्रेम करोनी जीव लावला पणास केवळ

व्यवहाराला बघत राहिला मेंदू माझा
हृदय बिचारे नित्य राहिले उदास केवळ

तुला आठवण असेल माझी अजून किंचित,
वेड्या या हृदयाचा वेडा कयास केवळ

गझलेवाचुन पान वहीचा रिता राहिला,
शेर अनामिक बोलत बसला समास केवळ...

कुणास जमले या वाटेवर चालुन जाणे ?
जे जे गेले, ते ते गेले लयास केवळ

- श्रीकांत चवरे
नाशिक / अकोला