दिनांक 27 व 28 जानेवारी 2024 , अमळनेर येथे होणारे पहिले अखिल भारतीय एल्गार मराठी गझल संमेलन  ऐतिहासिक असे ठरणार आहे

तिथे मुशायऱ्यात सहभागी होऊ इच्छिणाऱ्या गझलकरांसाठी  लिंक मधील फॉर्म भरून नोंदणी करणे आवश्यक आहे.

निवेदन पत्रातील नियम व अटींनुसार फॉर्म व्यवस्थित भरावा व सबमिट करावा. आपल्याला एक आटोमॅटिक रिप्लाय मिळेल . तो ई-मेल सेव्ह करून ठेवला

निवड संबंधी काही अधिक माहिती हवी असल्यास निवेदन पत्रातील निवड प्रक्रियेशी संबंधित नंबर वर फोन करू शकता. 

अधिकाधिक संख्येने ह्या गझलसोहळ्यात सहभाग नोंदवावा ही विनंती

फॉर्म ची लिंक https://forms.gle/cmo4GDDQx8jJDfVk6

चढतोय चढ कधीचा नाही उतार कुठला

माझ्याकडे सुखाचा नाही प्रकार कुठला

कुठलेच दुःख आता आश्चर्य देत नाही

मी झेलला न ऐसा नाही प्रहार कुठला

काहीच जीवनाचे माझ्याकडे न बाकी

व्यवहार ठेवला मी नाही उधार कुठला

मी वागलो कधीही माझ्या मनाप्रमाणे

केला मुळीच नाही आधी विचार कुठला

का राबतात माझी निंदा करायला ते ?

त्यांना न मानधन अन् नाही पगार कुठला

मी नेहमीच माझा सांभाळलाय दर्जा

लिहिला खायलसुद्धा नाही सुमार कुठला

होते मनात माझ्या ते बोललोच नाही

आला म्हणून तर मज नाही नकार कुठला

जगलोत फक्त येथे केले न भिन्न काही

जगण्यामधून अपुल्या आला न सार कुठला

 मी नेहमीच होतो उपरा जगापुढे

पण चेहरा बनवला हसरा जगापुढे

अपुल्या घरात होती माझी दशा अशी

पण नेहमी मिरवला नखरा जगापुढे

नक्कीच ते तुझाही घेतील फायदा

आहेस एक तूही बकरा जगापुढे

आशेवरी जगाच्या आयुष्य संपले

आता तरी अपेक्षा विसरा जगापुढे

कुठल्या भ्रमात मित्रा राहू नकोस तू

पर्याय आपल्यागत सतरा जगापुढे

बाहेर आसवांनो येऊ नका कधी

होईल काय तुमचा निचरा जगापुढे ?

शब्दात मांडण्याची घाई किती तुला?

श्रीकांत ! वेदना ही कचरा जगापुढे

 जो नको व्यवहार तो सारा करावा लागला

जीवना राडा तुझा मज निस्तरावा लागला

आवडावा मी तुला दुनिये असा नव्हतो मुळी

त्यामुळे तर साज हा मज पांघरावा लागला

राग व्यक्तिगत मला नव्हता तुझा दुनिये कधी

पण तुझा प्रस्ताव तेव्हा ठोकरावा लागला

सोबतीने रहुनीही फायदा नव्हता तुझा

हात मज हातामधे माझा धरावा लागला

माहिती आहे तुझी केली मदत नाही कुणी

शेवटी पर्याय माझा वापरावा लागला

झाकण्यासाठी तुझा खोटेपणा दुनियेपुढे 

नेहमी श्रीकांत हा खोटा ठरावा लागला

- श्रीकांत विजय चवरे