गाडगे बाबा

गाडगेबाबा : विनम्र अभिवादन

गाडगे डोक्यावरी घेऊन फिरला
चिंधड्या अंगावरी लेऊन फिरला
.
स्वार्थसाधू लोक सारे देव झाले
डेबुजी माणूस तू होऊन फिरला

            श्रीकांत_विजय_चवरे

वाटले होतो बदल काळाप्रमाणे

वाटले होतो  बदल काळाप्रमाणे
जाहली दुःखे डबल काळाप्रमाणे

सोबतीला कोणही येणार नाही
सोड वेडी आस चल काळाप्रमाणे

राहिला शाबूत येथे तोच आहे,
मारली ज्याने मजल काळाप्रमाणे

भोवला चांगुलपणा माझा मला हा,
शेवटी केला बदल काळाप्रमाणे

केवढी निष्ठा कधी त्यांच्यात होती
आज देतो रोज कल काळाप्रमाणे

              - श्रीकांत विजय चवरे
                         नाशिक

तुला भेटुनी

तुला भेटुनी आज संपली सखे भ्रमंती
मला दिली तू आणि दिली मी तुला पसंती

रंग-रूप अन् शिक्षण हुंडा ठेव बाजुला
मला बघूदे तुझ्या मनाची ही श्रीमंती

नवीन नाते दोन जिवांचे विणले जाते
हृदयाच्या कथनाला तेव्हा नको विनंती

सुंगध होउन जीवनात या दरवळ माझ्या
गुलाब हो तू कधी मोगरा अन् शेवंती

संसाराच्या वेलीवर घर इवले बांधू
नल मी होइन त्यात आणि तू हो दमयंती

वाट भासते अवघड पण दे साथ मला तू
तुझ्यासवे हा प्रवास होवो सुखकर अंती

          - श्रीकांत विजय चवरे
                     नाशिक
29.10.15

वेदनांना साहुनी वैराण होते....

वेदनांना साहुनी वैराण होते
एवढी कविता कशी हैराण होते ?

भासते आहे अजुन कळ काळजाला
लोचनांचे दोन तिरपे बाण होते

आजही पडतो मनाला प्रश्न राणी
गुंतले दगडात का हे प्राण होते ?

एवढा दुःखास मीही प्रीय झालो,
मांडले त्याने नशीबी ठाण होते

ये बरा आलास मरणा शेवटी तू
केवढे माझ्या जिवाला ताण होते

           - श्रीकांत विजय चवरे

04-09-15