भाव डोळ्यातले बोलके नेमके
बोलती नेहमी नेमके नेमके
राग येतो जरासा मलाही सखे,
आड येती तुझे हुंदके नेमके
आज भेटायला सांग येऊ कसा ?
हाय ! संपावरी चालके नेमके ...
शासनाचा गड्या नेम नाही अता
कोण हे बेत सांगू शके नेमके ?
भाव खाते किती ही गझल नेहमी
मागते शब्दही मोजके नेमके !
भेटले लाख शत्रू दयाळू मला
लाभले मित्र हे मारके नेमके
- श्रीकांत चवरे
नाशिक
(भुजंगप्रयात )
मनाला कवीते किती हाय त्रागा...
तुला पाहिजे का लगागा लगागा ?
कधी ओळ येते खयालात थोडी
कधी आशयाचा सुटे एक धागा...
दिले हाय आशीष की शाप आहे ?
कवी नेमका या विचारात जागा
तसा मूळचा खूप दिलदार आहे,
मला पाहिजे तेवढे शब्द मागा ...
छुपे सर्व मी जाणतो बेत आता
कितीही गड्यांनो इशार्यात वागा
कधी लावले एकही रोप नाही
म्हणे, "सर्वजागी फुलाव्यात बागा "
- श्रीकांत चवरे
नाशिक / अकोला
कसा सांग विसरू तुझा हा इशारा
हवा भेटता पेट घेतो निखारा
किती भ्रष्ट मी, हे मला बोलताना
खरे आपल्याही मनाला विचारा
चढे वीष माझ्यात या जीवनाचे
मला फक्त आता गझल ही उतारा
जरासे तरी दुःख येतेच मित्रा
सुखाचा इथे द्या कितीही पहारा
मला या सुखाचे न अप्रूप काही
नसे आणि दुःखातही तीटकारा
अशी कार्यशाळा न येणार कामी
स्वतःलाच पाण्यात आधी उतारा
न मी लावली नाममुद्रा कधीही
तखल्लूस माझा कुणाही विचारा
- श्रीकांत चवरे
नाशिक / अकोला
ट्रॅफिक सिग्नलची आरती
जय देवा ट्रॅफिकच्या जय सिग्नल देवा ।
कृपादृष्टी तुमची हिरवी ठेवा ।।धृ।।
चौकाचौकात तू एक भूप ।
गर्दी भक्तांची भोवती खूप ।
भासे सुंदर उन्नत रूप ।
हिरव्या रुपाचे वाटे हुरूप ।।१।। जय देवा...
तूला पाहता वाहन थांबे ।
कंटाळवाणा वेळही लांबे ।
आधीच झाला उशीर फार ।
दर्शन हिरवे दे, हो तू उदार ।।२।। जय देवा...
मार्ग हा सारा झालाय जाम ।
लाल रंगाने अडले काम ।
पोलिसदादा मागतो दाम ।
उन्हातान्हात आलाय घाम ।।३।। जय देवा...
- श्रीकांत चवरे
नाशिक
वेदना मिसर्यात या ठासून आली
ही गझल दुःखातही हासून आली
झोप गेली नेहमी डोळ्यातली या,
तू मला जेव्हाकधी भासून आली
त्रासुनी मजला सखे होतीस गेली,
तू परत माझ्याकडे त्रासून आली
धीर माझा सोडला नाही, जरीही
संकटे ही रोज आ वासून आली
भेटला होता दगा झाले बरे हे,
ही नजर आता नवी तासून आली
लेखणी ही नेहमी निर्भीड माझी,
उंबरे नच ही कधी घासून आली
- श्रीकांत चवरे
नाशिक
10-10-2017
वेदनांना साहुनी वैराण होते
एवढी कविता कशी हैराण होते ?
भासते आहे अजुन कळ काळजाला
लोचनांचे दोन तिरपे बाण होते
आजही पडतो मनाला प्रश्न राणी
गुंतले दगडात का हे प्राण होते ?
ये बरा आलास मरणा शेवटी तू
केवढे माझ्या जिवाला ताण होते
एवढा दुःखास मीही प्रीय झालो,
मांडले त्याने नशीबी ठाण होते
4-09-15
- श्रीकांत चवरे
नाशिक
पुरे जाहले हे तुझे जाच आता
मिळालेत रे बोट हे पाच आता
जमान्या किती ठेचली जात माझी
उभारून मीही असे टाच आता
निघे भाग्य माझे मुठीतून माझ्या
तुझ्या तूच रेषेतले वाच आता
तुझी चाकरी आज लाथाडली मी
तुझ्या त्या भ्रमाचे फुटे काच आता
तुझे हासणे भेटणे हे दिखावे
नको दाखवू ही अरे लाच आता
मला भेटले दिव्य हे ज्ञान आहे
तुला लागली वाटते आच आता
( ही पण १० वर्ष जुनीच आहे )
- श्रीकांत चवरे
नाशिक / अकोला
वेदना माझ्या खर्या मिसर्यात होत्या
राहिल्या गझला तरी कचर्यात होत्या
लागला नाही कधी तुज थांगपत्ता
केवढ्या युक्त्या तुझ्या नवर्यात होत्या
टाळले तू नेहमी होकार देणे
पण खुणा प्रेमातल्या गजर्यात होत्या
चांदण्या तू माळल्या केसात जेव्हा,
चांदण्याही या किती नखर्यात होत्या
लाजरे माझे हृदय आहे तरीही
पेटल्या इच्छा किती बुजर्यात होत्या
तू स्वतःच्या पाहिल्या नाही उणीवा
पाहिल्या, ज्या नेमक्या दुसर्यात होत्या
- श्रीकांत चवरे
नाशिक
11-10-2017
कवितेच्याही पुढे जराशी मजल करू दे
मनासारखी एक मलाही गझल करू दे
अजून नाही कोणालाही ओळख माझी
दुनियेला या मला बघूनी नवल करू दे
नेहमीच मी कर्तव्यांचा भरणा केला
थोडीशी मज हक्कांचीही उचल करू दे
मी तर सारे प्रश्न तुझे हे सोडवले बघ
माझ्या प्रश्नांचीही आता उकल करू दे
व्यवहाराचे जगणे माझे असेल चुकले
माणुसकीचे जगणे माझे सफल करू दे
- श्रीकांत चवरे
नाशिक / अकोला
सुवास....
( वृत्त - अनलज्वाला )
थांबवण्याचा मीही केला प्रयास केवळ
तुझा मोगरा ठेवुन गेला सुवास केवळ
विचार आधी मीही राणी केला नाही
प्रेम करोनी जीव लावला पणास केवळ
व्यवहाराला बघत राहिला मेंदू माझा
हृदय बिचारे नित्य राहिले उदास केवळ
तुला आठवण असेल माझी अजून किंचित,
वेड्या या हृदयाचा वेडा कयास केवळ
गझलेवाचुन पान वहीचा रिता राहिला,
शेर अनामिक बोलत बसला समास केवळ...
कुणास जमले या वाटेवर चालुन जाणे ?
जे जे गेले, ते ते गेले लयास केवळ
- श्रीकांत चवरे
नाशिक / अकोला
सहज
( वृत्त -मेनका )
बोलणे त्यांना सहज का वाटते ?
ही स्थिती माझी उपज का वाजते ?
राहवेना एकही क्षण साजणे
तू मला माझी गरज का वाटते ?
भेटतो सर्वत्र जर अल्ला मला,
जीवनी जावेच हज का वाटते ?
सांगतो सा-यास गुन्हेगार तू,
आज तू झालास जज का वाटते ?
मी तुला समजून घेतो नेहमी
अन् तुझी स्वार्थी समज का वाटते ?
बोलतो प्रत्येकजण देशावरी
एकटे मज राष्ट्र-ध्वज का वाटते?
(जो करे त्यालाच माहित संकटे,
अन् तुला सारे सहज का वाटते ?)
- श्रीकांत चवरे
नाशिक / अकोला
डोळे
( वृत्त - आनंदकंद )
रडतात संथ डोळे ,करतात खंत डोळे
वणव्यापरी दिवाणे, माझे ज्वलंत डोळे
खोटा कशास बोलू , मी भाळलो न तेव्हा,
इतके खरे परंतू , आले पसंत डोळे
येतेस मध्यरात्री तू आठवून जेव्हा,
भरतात कल्पनांनी हे आसमंत डोळे
डोळ्यात वेदनेची, असते अखंड वर्दळ
क्षण पापण्या लवोनी, घेती उसंत डोळे
मेलो तरी न सरली, तुज आस पाहण्याची
मेले शरीर अवघे, होते जिवंत डोळे
- श्रीकांत चवरे
नाशिक
(वृत्त - मंजुघोषा)
दूर तू आहेस हे होते अनावर
मार्ग शोधावा कसा या अंतरावर ?
सांग दुःखाला कसे मी पांगवू रे
वेदना ही जाहली हृदयात स्थावर
सोबती नाहीस तू आता तरीही,
संपला नाही तुझा स्वप्नात वावर..
भोवताली आठवांचा हा पसारा
माझिया प्राणास ये अन् तूच सावर
रोज माझ्या पापणीचा तोल जातो
येवुनी तू आसवांचा वेग आवर
- श्रीकांत चवरे
नाशिक / अकोला
05-09-2017
( वृत्त - आनंदकंद )
माझी पदोपदी तू केली जरी निराशा
आहे अजून थोडी जिंकायचीच आशा
घेणे नसे कुणाशी, नाही कुणास देणे
माझ्याच जीवनाचा झाला तरी तमाशा
सारे दिले तरी तू, नाहीस तृप्त झाला
देऊन संपलो मी वेड्या मना अधाशा
ते गाव शोधतो मी, तू जेथला निवासी
ना मार्ग माहिती मज, ना भेटला नकाशा
मी दोष देत नाही सारे तुला नशीबा
पदरात घेतल्या तू माझ्या चुका जराशा
पाहू नकोस माझ्या तू अंत सोसण्याचा
कंटाळशील तूही गुंडाळशील गाशा
आयुष्य वादळांना हे झेलण्यात गेले
भीती समिंदराची नसते कधी खलाशा
मी टाळले कुणाला नाही उगाच केव्हा
आला जरी घरी तू माझ्याच रे विनाशा
- श्रीकांत चवरे
नाशिक / अकोला
( वृत्त - देवप्रिया / कालगंगा )
लोचने ही कोरडी आला तरी का पूर हा ?
कोणती ही वेदना अन् कोणता काहूर हा
जाणले आता तुझ्या प्रेमात आहे पेटणे
पेटण्यासाठीच केला देह मी कापूर हा
सोबती असतेस तेव्हा धावतो वेगे किती ?
काळ आता थांबला आहे किती बघ क्रूर हा..
नेहमी माझा दिलेला शब्द मी तर पाळला
अन् तुला नाही तुझा, का ? वायदा मंजूर हा
एकटे जगण्यात येथे काय राणी फायदा ?
सोडुनी जातोय आता श्वास माझा दूर हा
- श्रीकांत चवरे
नाशिक
( वृत्त - मंजुघोषा )
भेटला नाही तुझा सहवास कायम
सोबती आहे तुझा आभास कायम
काय केले दोन घा-या लोचनांनी ?
जाहलो राणी तुझा मी दास कायम
तू तिथे, काही तुला जाणीव नाही
सोसला मी एकट्याने त्रास कायम
आज आयुष्यात या नाविण्य नाही
भंगलेली मात्र ही आरास कायम
प्रेम येथे नेहमी राहील माझे,
राहिला नाही जरी हा श्वास कायम
- श्रीकांत चवरे
12-09-2017
घेतली आता गझल हाती नवी ही
अन् फुटे दुःखास माझ्या पालवी ही
थांबलो असतो सखे तेव्हाच मागे
आस वेडी पावलांना चालवी ही
सत्य माझ्या नेहमी ओठात येते
बोलते दुनिया मला वेडा कवी ही
आज भ्रष्टाचार हा सामान्य झाला
लागली देशास सा-या वाळवी ही
वाटते कंटाळली प्रश्नास माझ्या
जिंदगी का उत्तरांना टोलवी ही ?
एकटे काळीज हे अस्वस्थ होते
सोबतीला वेदना वाटे हवी ही
- श्रीकांत चवरे
नाशिक
12-09-2017
पूजन
( वृत्त- अनलज्वाला, बहुस्वरी अलामत )
नास्तिक झालो, मी मूर्तीचे भंजन केले
माणसातल्या माणुसकीचे पूजन केले
माझ्यासाठी समान येथे मानव सारे
मी नाही धर्मात कधीच विभाजन केले
हात जोडुनी डोळे माझे मिटले मी, पण
विज्ञानाला डोळ्यांमधले अंजन केले
दंतकथांच्या मागे नाही गुरफटलो मी
इतिहासाच्या सत्यकथेंचे सर्जन केले
पाप आणि पुण्याची आता कुणास चिंता
मी हृदयाच्या दुःखाचे परिमार्जन केले
- श्रीकांत चवरे
नाशिक
रोज का वाढून ही जाते महागाई ?
कोण जाणे काय ही खाते महागाई
पाहता मज, दार जो तो लावुनी घेतो
दाखवी आता खरे नाते महागाई
मारते चाबूक आम्हा भाववाढीचे
आणि आनंदात ही गाते महागाई
ना कळे आहे तिचा हा काय जिव्हाळा !
नेमकी गरिबाघरी जाते महागाई
गाळतो मातीत आम्ही घाम रक्ताचे
क्रूर ही रक्तात त्या न्हाते* महागाई
हा कसा आम्ही तुझा अंदाज बांधावा ?
अन् कसे व्हावे तुझे ज्ञाते* महागाई
एकटा तू काय रे देणार श्रीकांता
संपवीते रोज हे दाते* महागाई
- श्रीकांत चवरे
नाशिक
( * न्हाते - स्नान करते
*ज्ञाते - ज्ञान असणारे
*दाते - दान करणारे )
तुझा मार्ग माझ्या दिशेने वळावा
उराचा तुझ्या टोलनाका टळावा
जिथे शेवटी मी तुला भेटलो..; त्या
तिथे एक आसू तुझा ओघळावा
म्हणे भाग्य संधी इशा-यात देते
मलाही इशारा तुझा सापडावा...
सदा संयमाने इथे वागलो मी
नको तोल आता असा हा ढळावा
गुलाबास काटे सखे मान्य येथे,
तुला हाय ! सहवास माझा नडावा ?
उमाळा तुझ्याही गळा दाटुदे रे
असा एकतर्फीच तो का रडावा ?
कशाला कुणाची उगा वाट पाहू ?
लढा आपला एकट्याने लढावा ...
- श्रीकांत चवरे
नाशिक
