सोबतीला एकटे क्षण राहिले थोडे...

सोबतीला एकटे क्षण राहिले थोडे
कोरड्या डोळ्यांत श्रावण राहिले थोडे

गुंतलो आता जरी जगण्यात मी राणी
आठवांचे आत हे कण राहिले थोडे

व्यक्त मी काव्यातुनी गझलेतुनी होतो
वाटते बोलायचे पण राहिले थोडे

चालतो देवा तुझ्या स्मरणात धिंगाणा
साजरे सात्वीक हे सण राहिले थोडे

ही जरी केली मशागत काळजाची मी
वासनांची कीड अन् तण राहिले थोडे

ये अता जन्मास तू अवनीवरी रामा
एकटी सीता नि रावण राहिले थोडे

                  - श्रीकांत विजय चवरे
                        9595374741