तुला भेटुनी

तुला भेटुनी आज संपली सखे भ्रमंती
मला दिली तू आणि दिली मी तुला पसंती

रंग-रूप अन् शिक्षण हुंडा ठेव बाजुला
मला बघूदे तुझ्या मनाची ही श्रीमंती

नवीन नाते दोन जिवांचे विणले जाते
हृदयाच्या कथनाला तेव्हा नको विनंती

सुंगध होउन जीवनात या दरवळ माझ्या
गुलाब हो तू कधी मोगरा अन् शेवंती

संसाराच्या वेलीवर घर इवले बांधू
नल मी होइन त्यात आणि तू हो दमयंती

वाट भासते अवघड पण दे साथ मला तू
तुझ्यासवे हा प्रवास होवो सुखकर अंती

          - श्रीकांत विजय चवरे
                     नाशिक
29.10.15